收息股概覽：重點介紹REIT

收息股概覽及REIT

收息股其實種類繁多，要衡量一隻收息股值唔值得投資， 息率係其中一個重要因素，但係單單淨係睇息率係唔夠，會同時衡量以下嘅因數：

1. 資產淨值
2. 過去五年嘅收入同派息
3. 派息或收入的可持續性及增長性

Reit 嘅生意來源係收租，由於一般符合以上條件，磚頭生意道理簡單，所以受一眾股民喜愛，而筆者留意開嘅Reit 都係香港或者新加坡上市的。

香港上市的reit 種類相對上唔係好多，龍頭823， 第二大的是冠君，但已經細好多啦。買賣 reit 我主要會睇佢嗰個派息比率同資產質素：

派息比率：如果派息每年不斷上升，該股份無可避免股價亦會不斷上升，有如823，不過如果睇返佢派息比率嗰個歷史估值，現價已經係歷史高位，同埋呢隻股票太多人研究，我就唔寫啦。

資產質素：資產質素好唔好，有少少主觀，因為始終百貨應百客。舉個例，有人認為領展的資產質素好，因為呎價平租金平，有升值潛力。亦都有人認為海港城（1997）嘅資產質素好，因為為處於香港核心商業地帶，無可代替。筆者係衡量呢個資產質素時，會比較着重於物業將來的租金是否可持續向上發展。

買賣策略：由於房地產信托基金派息相對穩定，一般係派息比率高位吸納已經相對穩陣。股票一般可以長揸收息，不過因為盈利通常都好穩定，符合呢個周期性嘅特質，當然亦都可以撥一部份抄波幅。不過最近好多呢類型嘅股份都升晒，暫時未覺得有邊一隻特別吸引。

特別提一提嘅係，香港有一隻人民幣結算嘅 reit 87001，股息嘅絕對值相對上非常高，差唔多成8%。

星加坡上市的reit ，種類繁多，股息率普遍都唔錯，坦白講我都冇隻隻研究，而且控制嘅資產質素參差，雖然其中一隻喺兩年來帶比我超過五成嘅回報，但都有兩隻坐艇中。買星加坡reit 要留意匯率風險，不過呢個風險亦都可以對沖到。

其中一個策略係可以借波紙買波紙，咁就可以完全對沖匯率嘅風險，當然過程中會有利息費用。筆者記得上年利息仲係低水平，嗰個時候呢個策略所賺取的息差都非常可觀。

其他類型收息股，買賣策略其實都差唔多，不過當然有少少差異，亦都有有一點特別唔同，都係果句，希望多啲人支持先再講。